Журналист Саша Тавольери маълумотига кўра, "Монако" "Комо" ярим ҳимоячиси Максим Какерени ўз сафига қўшиб олишга қизиқиш билдирмоқда.
Князлик клуби айни пайтда ярим ҳимоя чизиғини кучайтириш вариантларини кўриб чиқмоқда. Бунга Поль Погбанинг шартномасини бекор қилиш арафасида экани, шунингдек жамоанинг муҳим футболчиларидан бири Ламин Камаранинг кетиши мумкинлиги сабаб бўлмоқда.
Манбага кўра, "Монако" аввал "Лион"да тўп сурган Какерени асосий номзодлардан бири сифатида белгилаб олган. Клуб футболчининг ёзги трансфери имкониятларини муҳокама қилиш учун дастлабки мулоқотларни ҳам ўтказган.
26 ёшли француз ярим ҳимоячиси ўтган йили "Комо"га ўтганидан сўнг жамоанинг муҳим футболчиларидан бирига айланди. У клубнинг ўтган мавсум А Серияда кучли тўртликдан жой олиши ва тарихда илк бор Чемпионлар лигаси йўлланмасини қўлга киритишида катта ҳисса қўшди.
Какеренинг "Комо" билан амалдаги шартномаси 2029 йилга қадар мўлжалланган. Шу сабабли трансфер музокараларида Италия клубининг позицияси анча мустаҳкам ҳисобланади.
