«Арсенал» ва Англия терма жамоасининг собиқ ҳимоячиси Карл Женкинсон 34 ёшида профессионал футболчилик фаолиятини якунлаганини эълон қилди.

Футболчининг сўнгги клуби «Бромли» бўлди. У 2025/26 йилги мавсум охирида жамоани тарк этган эди.

«Чарльтон»даги болалик йилларимдан тортиб, «Бромли»даги сўнгги ўйинимгача — менинг йўлимнинг бир қисми бўлган барчага раҳмат. 8 ёшимдан бери футбол менинг ҳаётим эди. У менга кўп нарса берди, мен ҳам унга бор вужудимни бағишлаб хизмат қилдим», — деб ёзди Женкинсон ижтимоий тармоқдаги саҳифасида.

Женкинсон 2011 йилдан 2019 йилгача «Арсенал» шарафини ҳимоя қилиб, барча турнирларда 70 та ўйинда майдонга тушган. 2012 йилда у Англия терма жамоаси либосида ўзининг ягона ўйинини ўтказган.