"Арсенал" Англия Суперкубоги учун ўтказилган баҳсда "Манчестер Сити"ни 3:0 ҳисобида мағлуб этиб, янги мавсумни соврин билан бошлади. Кардиффдаги "Принсипалити" стадионида ўтган учрашув Микел Артета жамоасининг тўлиқ устунлиги остида кечди.
Лондонликлар ҳисобни ўйин бошланиши билан очди. Риккардо Калафьори 1-дақиқадаёқ Майлз Льюис-Скеллининг узатмасидан кейин гол урди. 28-дақиқада Кай Ҳаверц Кристос Цолиснинг пасини голга айлантириб, "Арсенал" устунлигини икки тўпга етказди. Иккинчи бўлимнинг 48-дақиқасида Мартин Эдегор учинчи голни киритиб, учрашув тақдирини амалда ҳал қилди.
"Манчестер Сити" сафида Ўзбекистон миллий жамоаси ҳимоячиси Абдуқодир Ҳусанов учрашувни асосий таркибда бошлади. Энцо Мареска уни Рубен Диаш ва Йошко Гвардиол билан бирга ҳимоя чизиғида майдонга туширди. "Сити" дарвозасини Жанлуижи Доннарумма қўриқлади, ҳужумда эса Эрлинг Ҳоланд, Антуан Семеньо ва Жереми Доку ҳаракат қилди.
Шу тариқа, амалдаги Англия чемпиони "Арсенал" янги мавсумдаги илк расмий учрашувидаёқ совринга эга чиқди. "Канонирлар" мазкур баҳсга қадар Англия Суперкубогини 17 марта қўлга киритганди ва "Сити" устидан қозонилган ғалаба клубга навбатдаги титулни келтирди.
Энцо Мареска учун эса "Манчестер Сити" бош мураббийи сифатидаги илк расмий учрашув йирик ҳисобдаги мағлубият билан якунланди.
