Ўзбекистон Суперлигасининг 17-туридан ўрин олган «Насаф» — «Пахтакор» учрашувида тошкентликлар 2:1 ҳисобида ғалаба қозонди. Бироқ ўйин статистикасига кўра, бир қатор асосий кўрсаткичларда мезбонлар устунлик қилган.

«Насаф»нинг кутилган голлар (xG) кўрсаткичи 1,30 ни, «Пахтакор»ники эса 1,14 ни ташкил этди. Қаршиликлар тўп назоратида ҳам озгина устун бўлди — 52 фоизга 48.

Рўзиқул Бердиев шогирдлари рақиб дарвозаси томон 17 марта зарба берди, шуларнинг 4 таси аниқ чиққан. «Пахтакор» эса 10 та зарбадан 3 тасини дарвозага йўллади. Паслар аниқлиги бўйича ҳам «Насаф» олдинда — 74 фоизга 72.

Баҳсда «Пахтакор» футболчилари 18 марта қоида бузган, «Насаф»да бу кўрсаткич 13 тани ташкил қилди. Бурчак зарбалари сони тенг — 3:3. Калит пасларда тошкентликлар 7:6 ҳисобида устун бўлди.

Учрашувда ҳисоб 15-дақиқада Алибек Давроновнинг автоголидан кейин очилди. 48-дақиқада Шароф Муҳиддинов мувозанатни тиклади, аммо 71-дақиқада Ойбек Бозоровнинг голи «Пахтакор»га ғалаба келтирди — 1:2.