Англия Премьер-лигаси ўйинлари трансляциясида футболчиларнинг ҳакамлар билан суҳбатларидан аудиолар илк бор намойиш этилади. Бу ҳақда The Guardian хабар берди.
Янгилик RefCam тизими имкониятларини кенгайтириш доирасида жорий қилинади. Ҳакам бошига ўрнатиладиган камера баҳсли вазиятларни унинг нуқтайи назаридан кўрсатиш имконини беради. Тизим ўтган мавсум олти ҳафталик синовдан ўтказилиб, кейин трансляцияларнинг доимий қисмига айланганди.
Аввал RefCam орқали ёзиб олинган суҳбатлардан ўйин вақтида фойдаланиш мумкин эмасди ва аудиолар бир неча кундан кейингина очиқланарди. Энди ҳар бир турда шундай ёзувлар мавжуд бир ёки иккита вазиятни деярли дарҳол такрорий лавҳа билан бирга намойиш этиш режалаштирилган.
Бироқ суҳбатлар тўғридан тўғри эфирда узатилмайди. Шунингдек, VAR текшираётган эпизодларга тегишли мулоқотлар ҳам эшиттирилмайди. Бунга IFAB қоидалари йўл қўймайди.
АПЛ ва аввал PGMOL номи билан фаолият юритган Pro Ref ташкилоти келажакда ҳакамлар мулоқотини жонли эфирда намойиш этишга рухсат олиш учун IFAB билан музокара олиб бормоқда.
