"Барселона" ярим ҳимоячиси Фермин Лопес жамоа ҳужум чизиғида Роберт Левандовски ва Ферран Торреснинг ўрнини ким эгаллаши мумкинлиги ҳақида фикр билдирди. Испаниялик футболчи зарурат туғилса, ўзи ҳам "сохта тўққизлик" ролида ҳаракат қилишга тайёрлигини айтди.
Каталония клуби янги мавсум олдидан марказий ҳужумчи позициясида ўзгаришларга дуч келди. Левандовски тўрт йиллик фаолиятидан сўнг "Барселона"ни тарк этди. Польяк футболчи клуб сафида жами 120 та гол урди. Ферран Торрес эса "ПСЖ"га кўчиб ўтди ва Париж клуби билан 2031 йилгача шартнома имзолади.
Ферминнинг фикрича, таркибда бу бўшлиқни тўлдириш имкониятига эга бир нечта футболчи бор.
"Билмайман, аммо Гордон ҳам марказий ҳужумчи сифатида ўйнай олади. Дани Ольмо, Рафинья ва мен ҳам у ерда ҳаракат қилишимиз мумкин. Агар яна футболчилар келса, кўрамиз. Лекин таркибимизда гол уришга қодир футболчилар шундоқ ҳам етарли.
Мен "сохта тўққизлик" позициясига мослаша оламан. "Ла Масия"да бу жойда кўп ўйнаганман. Бу позиция менинг энг севимли ролим — ҳужумкор ярим ҳимоячи вазифасига жуда ўхшайди", — деди Фермин.
Фермин тилга олган Энтони Гордон "Барселона"нинг янги мавсумдаги дастлабки трансфери бўлди. Англиялик футболчи "Ньюкасл"дан келиб, каталонияликлар билан 2031 йилгача шартнома тузган. У 16 август куни "Базель"га қарши ўртоқлик учрашувида "Барселона" сафида дебют қилди ва биринчи бўлимни тўлиқ ўтказди.
Ферминдан "Атлетико" ҳужумчиси Хулиан Альварес марказий ҳужумчи учун муносиб вариант бўладими, деб ҳам сўралди.
"Ҳа, менга ёқади. У ажойиб футболчи. Аммо охир-оқибат у "Атлетико Мадрид" футболчиси, шунинг учун бу ҳақда кўп нарса дея олмайман. Фақат шуни айтишим мумкинки, Альварес бизнинг таркибимиз ва ўйин услубимизга жуда яхши мос тушган бўларди", — деди у.
"Барселона"нинг ўзи ҳам Альваресни ҳужум марказини кучайтириш учун асосий вариантлардан бири сифатида кўриб келмоқда. Бироқ "Атлетико" аргентиналик футболчини қўйиб юборишга шошилмаяпти ва трансфер масаласи очиқлигича қолмоқда.
Ферминнинг ўзи ҳам сўнгги мавсумда ҳужумдаги самарадорлигини сезиларли оширди. 2025/26 йилги мавсумда у 13 та гол уриб, 17 та голли узатмани амалга оширган. Шу боис унинг "сохта тўққизлик"да ўйнаши Ҳанси Флик учун янги мавсумда қўшимча тактик вариантга айланиши мумкин.
