«Тоттенхэм» марказий ярим ҳимоячиси Пап Матар Сарр жорий ёзги трансфер ойнасида жамоани тарк этиши мумкин. Бу ҳақда CaughtOffside хабар берди.

Манба маълумотига кўра, 23 ёшли сенегаллик футболчи Матеуш Фернандеш ва Сандро Тонали трансферларидан сўнг кетиш ҳақида ўйлай бошлаган. Ушбу футболчиларнинг келиши марказий чизиқдаги рақобатни сезиларли даражада кучайтирган.

Қайд этилишича, «шпорлар» Сарр бўйича тушадиган таклифларни кўриб чиқишга тайёр, бироқ ҳозирча клубга расмий таклиф келиб тушмаган. Футболчига «Брентфорд», «Астон Вилла» ҳамда Саудия Арабистонининг «Ал-Аҳли» клуби қизиқиш билдирмоқда.

Манбага кўра, «Тоттенхэм» ярим ҳимоячисини тахминан 58,5 млн евро эвазига сотишга рози бўлиши мумкин.

Ўтган мавсумда Пап Матар Сарр барча мусобақалар доирасида 37 та ўйинда майдонга тушиб, 2 та гол урди ва 4 та голли узатмани амалга оширди.