Италиянинг «Комо» клуби қанот ҳужумчиси Ассане Диао Англия Премьер-лигасининг икки клуби қизиқиш доирасига тушди. Бу ҳақда таниқли журналист Николо Скира хабар берди.

Манба маълумотига кўра, «Комо» 20 ёшли сенегаллик футболчини сотиш ниятида эмас ва фақат 60 млн евро атрофидаги таклифларни кўриб чиқиши мумкин.

Шу билан бирга, Transfermarkt портали Диаонинг ҳозирги бозор қийматини 30 млн евро деб баҳоламоқда. Бу «Комо» футболчи учун сўраётган маблағдан икки баробар кам.

«Комо» Диаони ўтган йилнинг январь ойида «Бетис»дан 12 млн евро эвазига харид қилган эди. Шундан буён футболчи жамоа сафида 35 та учрашувда майдонга тушиб, 10 та гол урди ва 2 та голли узатмани амалга оширди.