«Динамо» жамоаси бугун, 21 август куни Суперлиганинг навбатдаги тури доирасида «Пахтакор»га қарши ўйинга тайёргарликни бошлади.

Муҳим учрашув арафасида самарқандликлар учун яхши хабар бор — жамоа тўпурари Анваржон Ҳожимирзаев жароҳатидан тикланиб, жамоавий машғулотларга қайтди.

Ҳужумчи 3 август куни «Нефтчи»га қарши ўтказилган ва 0:0 ҳисобида якунланган баҳсда жароҳат олган эди. Шундан сўнг у икки ҳафтадан ортиқ вақт давомида тикланиш жараёнини ўтказди.

Клуб тиббий бўлими тавсиясига кўра, Ҳожимирзаев 21 августдан жамоавий машғулотларда иштирок этишни бошлади.

Эслатиб ўтамиз, Олмалиқдаги ғалабадан сўнг «Динамо» Суперлиганинг 19-турида «Пахтакор»ни қабул қилади. Учрашув 25 август куни Самарқандда бўлиб ўтади.