«Тоттенхэм» бош мураббийи Роберто Де Зерби Англия Премьер-лигасининг 1-турида «Брентфорд»дан учралган 0:3 ҳисобидаги мағлубият учун узр сўради.

«Бизга жисмоний тайёргарлик етишмади. Бу муаммога айланиши мумкинлигини олдиндан билардик. Прессингни бошлаш учун керакли лаҳзани танлашда жуда кўп хато қилдик ва «Брентфорд» билан тенгма-тенг курашиш учун ҳаддан ташқари кўп яккакурашларни бой бердик.

Бунинг учун ҳам, мағлубият учун ҳам узр сўрайман», — дея Де Зербининг сўзларини Sky Sports келтирди.

Италиялик мутахассис таркибдаги катта ўзгаришлардан кейин ўзаро ҳамжиҳатликни шакллантириш учун «Тоттенхэм»га вақт кераклигини таъкидлади.

«Жисмоний ҳолатимиз ва ўйинни ташкил этишимизни яхшилашимиз лозим. Таркибимизда янги футболчилар кўп. Ҳақиқий жамоага айланиш учун бизга характер ва аниқ ўйин услуби керак.

Бугун характер бор эди, аммо яккакурашларда нотўғри ҳаракат қилдик».

Де Зерби «Тоттенхэм» яна Премьер-лигада жон сақлаб қолиш учун курашиши мумкинлиги ҳақидаги тахминларни рад этди.

«Футболчиларимга ишонаман ва уларга бўлган ишончимни йўқотганим йўқ. Биз ишлашимиз, учрашувни таҳлил қилишимиз ва ўйинни яхшилаш йўлларини топишимиз керак.

Шу пайтгача амалга оширган барча ишларимизни йўққа чиқара олмаймиз. Айрим футболчилар, жумладан, Сенеси ва Бергвалль мавсумга тайёргарликни кеч бошлади. Аммо баҳона қилишни истамайман.

Курашиш учун тўғри кайфиятни топишимиз зарур. Бундай натижани кутмагандим, гарчи қандай муаммоларга дуч келишимиз мумкинлигини билган бўлсам ҳам», — дея хулоса қилди мураббий.

«Тоттенхэм» 26 август куни Англия Лига кубоги доирасида «Чарльтон»ни қабул қилади.