Массимилиано Аллегри «Наполи» бош мураббийи сифатида Италия чемпионатидаги илк учрашувини ғалаба билан якунлади. Неаполликлар сафарда «Женоа»ни 2:0 ҳисобида мағлуб этди.

Голлар фақат иккинчи бўлимда урилганига қарамай, Аллегри жамоаси катта муаммоларга дуч келмаганини таъкидлади.

«Дастлабки 25 дақиқада қийинчиликларга дуч келдик. «Женоа»нинг босими остида тўп билан муомала қилишда бир нечта техник хатога йўл қўйдик.

Кейин ўйин суръатини оширдик ва жарима майдонига узатилган учта тўпдан яхшироқ фойдаланишимиз мумкин эди. Иккинчи бўлимда яхши ҳаракат қилдик ва 83-дақиқада гол урдик. Аммо ҳисобни анча олдинроқ очиш имкониятига эга эдик», — дея Аллегрининг сўзларини calcionapoli1926.it келтирди.

Эслатиб ўтамиз, «Наполи» ўтган мавсумни Италия чемпионатида иккинчи ўринда якунлаган.