Лондоннинг «Арсенал» клуби вингери Габриэл Мартинелли жамоани тарк этишга яқин турибди. Бразилиялик футболчини ўз сафига қўшиб олиш бўйича Саудия Арабистонининг «Ал-Ҳилол» клуби музокара олиб бормоқда.

Журналист Бен Жейкобс маълумотига кўра, «Ал-Ҳилол» 25 ёшли футболчи учун қарийб 50 млн фунт стерлинг (тахминан 58 млн евро) тўлашга тайёр. Мартинеллининг ўзи ҳам Саудия Арабистонига кўчиб ўтишга рози. «Арсенал» эса футболчига жамоа таркибида унга жой йўқлигини аллақачон маълум қилган.

Аввалроқ Мартинелли Туркиянинг «Галатасарой» клубига ўтиш таклифини рад этган эди. Бразилиялик футболчи «Арсенал» сафида ўтказган етти йил давомида барча мусобақаларда жами 278 та ўйинда майдонга тушиб, 62 та гол урди ва 36 та голли узатмани амалга оширди.

«Ал-Ҳилол» шунингдек, «Челси» вингери Педру Нетуни ҳам ўз сафига қўшиб олишга қизиқиш билдирган. Бироқ лондонликлар футболчи учун 115 млн евродан зиёд маблағ талаб қилгани сабабли Саудия Арабистони клуби трансфердан воз кечишга мажбур бўлган.