Каталониянинг «Барселона» клуби Ла Лиганинг 2-тури доирасида «Эльче»га қарши кечган ўйин (5:0) олдидан мухлислар ва клуб аъзоларига нисбатан полиция томонидан куч ишлатилганини қоралаб, расмий баёнот билан чиқди.
Клуб баёнотида айниқса «Барселона» мухлисларидан бирининг ҳибсга олинишига алоҳида эътибор қаратилган. Раҳбарият ҳуқуқ-тартибот органларининг бу ҳаракатларини номуносиб, асоссиз ва вақтсиз деб атади ҳамда ҳибсга олинган шахс ва унинг оиласига зарур ёрдам кўрсатилишини маълум қилди.
Шунингдек, клуб полиция томонидан мухлислардан Каталония рамзлари бўлган «эстелада» байроқларининг олиб қўйилганидан ташвишда эканини билдирди. Баёнотда таъкидланишича, бу рамзлар қонуний ҳисобланади ва уларни намойиш этиш ўз фикрини эркин ифода этиш шакли бўлиб, у ҳеч қачон зўравонлик ёки нафратга чақириқ сифатида баҳоланиши мумкин эмас.
«Барселона» содир бўлган ҳодиса юзасидан изоҳ кутиб қолишини ва ўз мухлисларининг ҳуқуқлари, қадр-қиммати ҳамда сўз эркинлигини ҳам «Камп Ноу», ҳам бошқа стадионларда ҳимоя қилиш учун барча зарур чораларни кўриш ҳуқуқини ўзида сақлаб қолишини билдирди.
