Томас Мюллер, Матс Хуммельс ва Янн Зоммер Португалиянинг «Эштрела Амадора» клуби ҳаммулкдорларига айланди.

Маълумотларга кўра, немис инвесторлар гуруҳи клубнинг профессионал футболни бошқарувчи компанияси — SAD акцияларининг 90 фоизини 40 миллион еврога сотиб олди. Мюллер, Хуммельс ва Зоммер ҳам ушбу инвесторлар гуруҳи таркибига кирган. Бу Португалия футболида клубнинг назорат пакетини сотиш бўйича рекорд келишув сифатида қайд этилмоқда.

«Эштрела Амадора»нинг энг катта ютуқларидан бири 1990 йилга тўғри келади — ўшанда жамоа Португалия кубогини қўлга киритган. Клуб 2023 йилда Португалия олий дивизионига қайтган ва ҳозир Примейра-лигада кетма-кет тўртинчи мавсумини ўтказмоқда.