Нидерландия терма жамоаси бош мураббийи Хави миллий жамоа техник директори Найжел де Йонгнинг испаниялик мутахассис ушбу лавозим учун учинчи номзод бўлгани ҳақидаги сўзларига муносабат билдирди. Биринчи номзод Хосеп Гвардиола, иккинчиси эса Арне Слот бўлган.
«Учинчи ёки ўнинчи номзод бўлганимнинг мен учун аҳамияти йўқ. Нидерландия терма жамоаси бош мураббийи бўлиш мен учун катта шараф. Биласиз, менинг бу мамлакат билан алоҳида ва яқин боғлиқлигим бор. Бугун ўзимни худди футбол университетига келиб қолгандек ҳис қиляпман.
Мен шахсан бу авлодга ишонаман. Аммо энг муҳими — рақобатбардош бўлишимиз учун ҳақиқий жамоа ва оила яратиш.
Биз ўйинда устунлик қилишни, ташаббусни ўз қўлимизга олишни ва майдондаги иштиёқимизни кўрсатишни истаймиз. Биз бу ерга ғалаба қозониш учун келдик. Яна бир бор такрорлайман — ғалаба қозониш учун. Мен ғолибман. Бу лойиҳага чин дилдан ишонаман ва ишни бошлашни сабрсизлик билан кутяпман», — дея Хавининг сўзларини келтиради AS.
46 ёшли Хави 12 август куни Нидерландия терма жамоаси бош мураббийи этиб тайинланган. Унинг шартномаси 2030 йилга қадар мўлжалланган.
Испаниялик мутахассис 2026 йилги жаҳон чемпионатининг 1/16 финалида Марокашга қарши ўйинда асосий вақт 1:1 ҳисобида якунланиб, пенальтилар сериясида 2:3 ҳисобида мағлуб бўлинганидан кейин лавозимини тарк этган Роналд Куман ўрнини эгаллади.
Хави 2021–2024 йилларда «Барселона»ни бошқарган ва клуб билан Испания чемпионати ҳамда Суперкубогини қўлга киритган. Бунга қадар у Қатарнинг «Ас-Садд» жамоасида ишлаган.
Нидерландия терма жамоаси Хавининг мураббийлик фаолиятидаги илк миллий жамоа бўлди.
