"Фейеноорд" трансфер бозорида фаол иш олиб бормоқда ва "Манчестер Юнайтед"нинг 18 ёшли ҳужумчиси Чидо Обини ижарага олиш имкониятини кўриб чиқмоқда.

De Telegraaf нашри маълумотига кўра, айни пайтда клублар ўртасида музокаралар давом этмоқда.

Оби ҳозирча "Манчестер Юнайтед"нинг асосий жамоасида мунтазам ўйин амалиётига даъвогар эмас. Шу сабабли Англия клуби унга кўпроқ майдонга тушиш имконияти бериладиган жамоага ижарага юбориш вариантини кўриб чиқишга тайёр.

Transfermarkt портали ҳужумчининг трансфер қийматини 5 миллион еврога баҳоламоқда. Бироқ "Фейеноорд" ҳозирча футболчини айнан ижарага олишга қизиқмоқда.

Эҳтимолий битимда кейинчалик сотиб олиш ҳуқуқи бўладими ёки йўқми, ҳозирча маълум эмас.

Ўтган мавсумда Чидо Оби 37 та учрашувда майдонга тушиб, 20 та гол урди ва 6 та голли узатмани амалга оширди.