Инсайдер Фабрицио Романонинг эксклюзив маълумотига кўра, "РБ Лейпциг" сўнгги 48 соат ичида "Барселона" билан боғланиб, Марк Касадонинг трансфери қандай шартларда амалга ошиши мумкинлигини сўраган клублардан бири бўлди.
22 ёшли ярим ҳимоячининг "Барселона"дан кетиши якуний босқичга яқинлашмоқда. Айни пайтда унинг кейинги манзили бўйича бир нечта вариант кўриб чиқилмоқда.
"РБ Лейпциг"дан ташқари, Туркиянинг бир қатор клублари ҳам трансфер ойнаси ёпилгунига қадар испаниялик футболчини ўз сафига қўшиб олишга жиддий қизиқиш билдирмоқда.
Бу маълумот Mundo Deportivo'нинг аввалги хабари билан ҳам мос келади. Унга кўра, "Барселона" ичида ўтказилган спорт йиғилишида Жоан Лапорта ва Деку асосий жамоа таркибини ихчамлаштириш мақсадида Касадо ҳамда ёш ҳимоячи Эктор Фортнинг кетиши бўйича ишлар якуний босқичда эканини тасдиқлаган.
