Чоршанба куни Мадриднинг «Реал» клуби Ла Лига доирасида ўз майдонида «Реал Сосьедад»ни 4:1 ҳисобида мағлуб этди.

«Қаймоқранглилар»нинг янги футболчиси Марк Кукурелья танаффусдан сўнг Альваро Каррерас ўрнига майдонга тушди. Бу 28 ёшли жаҳон чемпионининг «Реал» сафида «Сантьяго Бернабеу»даги дебют учрашуви бўлди.

«Бу ажойиб эди! Бундан ортиғини истаб ҳам бўлмайди. «Бернабеу»да мухлисларимиз қаршисида ўйнаб, устига-устак ғалаба қозониш — мен жуда хурсандман», — деди Кукурелья. Унинг сўзларини Madrid Xtra келтирди.

«Реал» Кукурельяни ёз бошида «Челси»дан харид қилган эди.

Учрашув бошланишидан олдин Марк Кукурелья июль ойида Испания терма жамоаси сафида қўлга киритган Жаҳон чемпионати кубогини маҳаллий мухлисларга намойиш қилди.