«ПСЖ»нинг 18 ёшли қанот ҳужумчиси Ибраҳим Мбайе «Астон Вилла»га ўтишга яқин турибди. Сенегаллик футболчи бугун тиббий кўрикнинг биринчи босқичидан ўтади, трансфер эса якшанба куни расман якунланиши кутилмоқда.
«Астон Вилла» Мбайе трансфери бўйича «ПСЖ» билан 55 миллион евро миқдорида келишувга эришган. Айни пайтда битимнинг сўнгги расмий жараёнлари амалга оширилмоқда.
Мбайега Англияга сафар қилиш учун рухсат берилган ва у яқин вақт ичида Бирмингемга етиб бориши кутилмоқда. Унаи Эмери бошчилигидаги жамоа ёзги трансфер ойнаси ёпилишидан олдин келишувни тўлиқ якунлашга ҳаракат қилмоқда.
Истеъдодли ҳужумчига бир қатор клублар, жумладан, «Ливерпуль» ҳам қизиқиш билдирган. Бироқ «Астон Вилла» тезкор ҳаракат қилиб, футболчи трансферида устунликни қўлга киритди.
Кутилишича, Мбайе янги клуби билан яна бир йилга узайтириш имкониятини ўз ичига олган беш йиллик шартнома имзолайди.
Ушбу трансфер «Астон Вилла» учун навбатдаги йирик сармоя бўлади. Унаи Эмери ёздаги бир қатор муҳим йўқотишлардан сўнг жамоанинг ҳужум чизиғини қайта шакллантиришда давом этмоқда.
