Шанба куни Бундеслиганинг 1-турида «Эльверсберг» ўз майдонида «Байер»ни қабул қилди. Германия элитасида дебют қилаётган мезбонлар сенсацион тарзда 3:2 ҳисобида ғалаба қозонди.
«Байер» учун учрашув бошиданоқ омадсиз кечди. 8-дақиқада Франсис-Икечукву Оньеканинг узатмасидан сўнг Лукас Петков ҳисобни очди.
Орадан бир дақиқа ўтиб, Коул Кэмпбелл «Эльверсберг»нинг устунлигини икки карра оширди. 46-дақиқада эса Лукас Петковнинг узатмасидан кейин Давид Моква ҳисобни 3:0 га етказди.
77-дақиқада Патрик Шикнинг аниқ зарбаси «Байер»га умид бағишлади. Қўшимча вақтда Кристиан Кофане фарқни битта голга қисқартирди. Бироқ леверкузенликлар мағлубиятдан қутулиб қола олмади.
