«Сассуоло» ҳужумчиси Доменико Берарди «Торино»га қарши учрашувда гол уриб, жамоасига ғалаба келтирди.

Бу италиялик футболчининг А Серияда «Сассуоло» сафида урган 131-голи бўлди. Шу тариқа, Берарди Италия чемпионати тарихида битта клуб таркибида энг кўп гол урган футболчилар орасида кучли олтиликка кирди.

Ундан атиги бир гол олдинда «Интер» ҳужумчиси Лаутаро Мартинес турибди. Аргентиналик футболчи миланликлар сафида А Серияда 132 та гол урган.

Бу кўрсаткич бўйича рекорд Франческо Тоттига тегишли. «Рома» афсонаси Италия чемпионатида клуби учун 250 та гол урган.

Иккинчи ўринни эса Алессандро Дель Пьеро эгаллаб турибди. У «Ювентус» сафида А Серияда 188 та гол муаллифи бўлган.