«Манчестер Юнайтед»нинг собиқ футболчиси Жейдон Санчо фаолиятини «Палмейрас»да давом эттиришга қарор қилди.
The Touchline журналист Альфонсо Партидорга таяниб хабар беришича, 26 ёшли вингер чоршанба куни эрталаб Бразилияга етиб боради, тиббий кўрикдан ўтади ва Сан-Паулу клуби билан шартнома имзолайди.
Англиялик футболчи билан тузиладиган келишув икки йилга мўлжалланади. Шунингдек, шартномани яна бир йилга узайтириш имконияти ҳам кўзда тутилган.
Жейдон Санчо июль ойи бошида «Манчестер Юнайтед» билан шартномаси муддати тугагач, эркин агентга айланган эди. Ўтган мавсумда у «Астон Вилла» сафида ижара асосида тўп сурди.
«Палмейрас» Бразилия А Сериясининг 25 туридан кейин 52 очко жамғарган ҳолда турнир жадвалида етакчилик қилмоқда.
