"Ливерпуль"дан "Леванте"га ижарага берилган Ифеаньи Ндукве Англияда расмий футбол ўйнаш ҳуқуқини қўлга киритиш учун Ла Лигада атиги битта учрашувда майдонга тушиши керак. Бу ҳақда журналист Жеймс Пирс хабар берди.
18 ёшли футболчи "Ливерпуль"га Австриянинг "Аустрия Вена" клубидан тахминан 2,6 миллион фунт эвазига ўтган. Келишувда қўшимча бонуслар ҳам кўзда тутилган. Мерсисайдликлар Австрия ёшлар терма жамоаси футболчиси билан дастлаб 2026 йил январда келишувга эришган ва кейинчалик у билан узоқ муддатли шартнома имзолаган.
Ндукве "Ливерпуль"да яхши таассурот қолдирган ва ҳатто жамоа сардори Виржил ван Дейкнинг мақтовига сазовор бўлган.
Бироқ футболчи Буюк Британияда ишлаш рухсатномаси талабларига жавоб бермагани сабаб жорий мавсумда "Ливерпуль"да қололмади.
Шундан сўнг мерсисайдликлар уни "Леванте"га ижарага берди. Испания клуби бош мураббийи Луис Кастро бу трансфер ёш футболчининг ривожланиши учун фойдали бўлишига клубни ишонтирган.
Энди Ндуквега Ла Лигада атиги битта ўйин ўтказиш кифоя. Шундан кейин у Англияда расмий мусобақаларда иштирок этиш учун зарур талабларга жавоб беради.
Футболчининг вазияти январда қайта кўриб чиқилади. "Ливерпуль" уни жамоага қайтариш ёки мавсум охиригача "Леванте"да қолдириш бўйича қарор қабул қилади.
