«Порту» Бразилиянинг энг иқтидорли ёш футболчиларидан бири Габриэл Мекни «Гремио»дан трансфер қилганини расман эълон қилди.

Португалия клуби 18 ёшли футболчи учун 11 миллион евро тўлади. Габриэл Мек «Порту» билан 2031 йилга қадар мўлжалланган беш йиллик шартнома имзолади.

Ёш бразилияликка Европанинг бир қатор клублари қизиқиш билдирган эди, аммо уни ўз сафига қўшиб олиш учун кечган курашда Португалия чемпиони устун келди.

«Ҳамма «Порту» қандай буюк клуб эканини яхши билади. Бу Чемпионлар лигасида икки марта ғолиб чиққан ва Португалияда энг кўп соврин ютган клуб.

Мен бу ерга жамоага ёрдам бериш ниятида келдим. Бу мен учун орзу эди. Ҳар сафар майдонга тушганимда бор кучимни бераман. Жуда кўп инсонлар менинг ўрнимда бўлишни исташини яхши тушунаман ва бу имкониятга эга бўлганим учун Худога шукр қиламан. Умид қиламанки, бу ерда кўплаб совринларни қўлга киритамиз ва чемпионлик унвонимизни ҳимоя қиламиз», — деди қанот ҳужумчиси ва ҳужумкор ярим ҳимоячи позицияларида ўйнай оладиган Габриэл Мек.