Америкалик ММА жангчиси Шон Бредининг айтишича, Ислом Махачев учун энг хавфли рақиб — эквадорлик Майкл Моралес. У бошқа бир даъвогар Карлос Пратесдан кўра Исломга кўпроқ қийинчилик туғдириши мумкин.

“Кўпчилик ўз вақтида Моралесга ютқазганим учун унинг ёнини оляпти деб ўйлаши мумкин, аммо у чиндан ҳам Исломга қийинчилик туғдиради. Пратеснинг видеоларини кўрдим: ONE FC лигасида йигитлар уни партерга йиқитиб, бемалол дўппослашган. Ислом ҳам уни худди шу аҳволга солиши аниқ. Моралеснинг эса партерда қандай ҳаракат қилиши ва чидамлилиги нечўғли экани ҳозирча кўпчиликка қоронғи”, дейди Бреди.

Эслатиб ўтамиз, Ислом Махачев ярим ўрта вазнга кўтарилиб, чемпионлик камарини қўлга киритган эди. У сўнгги жангида ирландиялик Ян Геррини енгиб, унвонини муваффақиятли ҳимоя қилди. Айнан шу ғалабадан кейин россиялик жангчи навбатдаги рақиби сифатида Карлос Пратесни кўрмоқчи эканини маълум қилганди.

Шунингдек, унинг мураббийи Хавер Мендес Исломнинг навбатдаги жанги 2026-йилнинг декабрь ойида бўлиб ўтиши мумкинлигини айтган эди.