"Олтин тўп"-2000 соҳиби Луиш Фигу замонавий трансфер бозоридаги улкан маблағлар ҳақида фикр билдирди ва "Реал Мадрид" ҳамда Европанинг бошқа клублари амалга ошираётган кўп миллионлик трансферларнинг молиявий мантиғига шубҳа қилди.
Фигу катта клублар бундай маблағларни сарфлаш имкониятига эга эканини инкор этмади. Бироқ у қиммат трансферлар харажатини футболка сотуви орқали қоплаш мумкин, деган қарашга қўшилмайди.
"Бир кун келиб бу тўхташи керак. Албатта, ҳаммаси клуб бюджетлари ва молиявий фэйр-плей талабларига боғлиқ. Аммо ҳозирги суммалар жуда юқори.
Менимча, масалан, 150 миллионлик трансферни, одамлар доимо айтадиган ёки бошқаларни ишонтиришга уринадиганидек, футболка сотиш орқали молиявий жиҳатдан қоплаб бўлмайди. Бундай трансфер спорт нуқтаи назаридан ўзини оқлаши мумкин, аммо молиявий томондан бу жуда мураккаб", — деди Фигу.
Португалиялик собиқ футболчи ҳозирги вазиятни ўзи тўп сурган давр билан ҳам таққослади.
"Менинг давримдан бери қарийб 30 йил ўтди. Ўша пайтда ҳам кўплаб трансферлар учун тўланаётган суммаларни ақл бовар қилмас деб ҳисоблардим. Аммо бозор ривожланиши натижасида ҳозир айрим футболчилар учун янада ақл бовар қилмас маблағлар тўланмоқда", — деди у.
Фигунинг бу фикрлари "Реал Мадрид" Диоманде учун 125 миллион евро тўлаган, бошқа клублар эса Энцо Фернандес ёки Брэдли Барколя каби футболчилар учун 145 миллион евро ва ундан ҳам кўпроқ маблағ сарфлаган ёзги трансфер ойнаси фонида янгради.
Фигунинг фикрича, футболчининг майдондаги натижалари бундай харажатни спорт нуқтаи назаридан оқлаши мумкин, аммо молиявий ҳисоб-китобда бундай трансферларни ўзини қоплайдиган битимга айлантириш жуда қийин.
