"Локомотив" бош мураббийи Мирко Йеличич Суперлиганинг 20-турида "Навбаҳор"га қарши кечган ва 1:1 ҳисобида якунланган учрашувдан сўнг ўз фикрларини билдирди.
Мутахассис Намангандаги баҳс жисмоний ва техник жиҳатдан оғир ўтишини олдиндан кутганини таъкидлади.
"Жисмоний ва техник томондан бу ўйин иккала жамоа учун ҳам шундай қийин бўлишини кутгандик. Тактик жиҳатдан бу майдонда ҳаракат қилиш жуда қийин. Бугун иккала жамоа ҳам ғалаба учун курашди ва бунга хоҳиш юқори эди.
Ҳозир таркибимизда бир қанча асосий футболчилар йўқ. Шу сабабли ротацияда қийналдик ва ўзимизнинг энг яхши таркибимиз билан кела олмадик", — деди Йеличич.
Мураббий иккинчи бўлимда амалга оширилган ўзгаришлар "Локомотив" ўйинига таъсир қилганини ҳам изоҳлади. Унинг айтишича, Шуҳрат Муҳаммадиев жароҳат аломатларини ҳис қилгани учун алмаштирилган. Узоқ вақтдан бери майдонга тушмаган Диёр Туроповга эса ўйин амалиёти бериш режалаштирилган.
"Бизга нималар етишмаётганини кўрдик ва буни кимлар орқали ўзгартира олишимизни тушундик. Менимча, захирадан футболчиларни майдонга туширишни бироз кечроқ бошладик", — деди мутахассис.
Йеличич Абраев, Шодибоев, Реимов ва Ибраимовнинг терма жамоалар йиғинларида экани "Локомотив"нинг ҳужумдаги имкониятларини сезиларли даражада чеклаганини қайд этди.
"Уларнинг барчаси ҳужумкор футболчилар. Улар тезликни оширишда ёрдам беради. Бугун Туропов ва Яхшибоевдан ташқари захирада асосан ёшлар ўтирди. Олдимизда деярли танлов қолмаганди. Улар ҳали бир ой давомида таркибда бўлишмайди ва бу бизга қийинчилик туғдиради", — деди Йеличич.
Шунингдек, "Локомотив" устози "Навбаҳор"нинг чемпионлик имкониятларига ҳам баҳо берди.
"Жуда қийин. Жадвал юқорисидаги икки жамоа анча олдинлаб кетган. Уларни "ушлаб олиш", менимча, энди деярли имконсиз. "Навбаҳор" сифатли жамоа, таркибида яхши футболчилар бор ва улар жадвалнинг юқори қисмида бўлади. Лекин 1 ёки 2-ўринга кўтарилиш жуда қийин", — деди у.
Йеличичнинг таъкидлашича, "Локомотив"нинг асосий мақсади барқарор жамоа шакллантириш ва тажрибали футболчилар ёрдамида ёшларни ривожлантиришдан иборат.
"Ёшларга кўпроқ имконият берсак, келгуси мавсумда улар бизга яхшигина ёрдам беради", — дея фикрини якунлади мутахассис.
