"Lokomotiv" bosh murabbiyi Mirko Yelichich Superliganing 20-turida "Navbahor"ga qarshi kechgan va 1:1 hisobida yakunlangan uchrashuvdan so‘ng o‘z fikrlarini bildirdi.

Mutaxassis Namangandagi bahs jismoniy va texnik jihatdan og‘ir o‘tishini oldindan kutganini ta’kidladi.

"Jismoniy va texnik tomondan bu o‘yin ikkala jamoa uchun ham shunday qiyin bo‘lishini kutgandik. Taktik jihatdan bu maydonda harakat qilish juda qiyin. Bugun ikkala jamoa ham g‘alaba uchun kurashdi va bunga xohish yuqori edi.

Hozir tarkibimizda bir qancha asosiy futbolchilar yo‘q. Shu sababli rotasiyada qiynaldik va o‘zimizning eng yaxshi tarkibimiz bilan kela olmadik", — dedi Yelichich.

Murabbiy ikkinchi bo‘limda amalga oshirilgan o‘zgarishlar "Lokomotiv" o‘yiniga ta’sir qilganini ham izohladi. Uning aytishicha, Shuhrat Muhammadiyev jarohat alomatlarini his qilgani uchun almashtirilgan. Uzoq vaqtdan beri maydonga tushmagan Diyor Turopovga esa o‘yin amaliyoti berish rejalashtirilgan.

"Bizga nimalar yetishmayotganini ko‘rdik va buni kimlar orqali o‘zgartira olishimizni tushundik. Menimcha, zaxiradan futbolchilarni maydonga tushirishni biroz kechroq boshladik", — dedi mutaxassis.

Yelichich Abrayev, Shodiboyev, Reimov va Ibraimovning terma jamoalar yig‘inlarida ekani "Lokomotiv"ning hujumdagi imkoniyatlarini sezilarli darajada cheklaganini qayd etdi.

"Ularning barchasi hujumkor futbolchilar. Ular tezlikni oshirishda yordam beradi. Bugun Turopov va Yaxshiboyevdan tashqari zaxirada asosan yoshlar o‘tirdi. Oldimizda deyarli tanlov qolmagandi. Ular hali bir oy davomida tarkibda bo‘lishmaydi va bu bizga qiyinchilik tug‘diradi", — dedi Yelichich.

Shuningdek, "Lokomotiv" ustozi "Navbahor"ning chempionlik imkoniyatlariga ham baho berdi.

"Juda qiyin. Jadval yuqorisidagi ikki jamoa ancha oldinlab ketgan. Ularni "ushlab olish", menimcha, endi deyarli imkonsiz. "Navbahor" sifatli jamoa, tarkibida yaxshi futbolchilar bor va ular jadvalning yuqori qismida bo‘ladi. Lekin 1 yoki 2-o‘ringa ko‘tarilish juda qiyin", — dedi u.

Yelichichning ta’kidlashicha, "Lokomotiv"ning asosiy maqsadi barqaror jamoa shakllantirish va tajribali futbolchilar yordamida yoshlarni rivojlantirishdan iborat.

"Yoshlarga ko‘proq imkoniyat bersak, kelgusi mavsumda ular bizga yaxshigina yordam beradi", — deya fikrini yakunladi mutaxassis.