«Бавария» президенти Герберт Хайнер Bild нашрига берган интервьюсида «Шальке» раҳбари Аксель Хефернинг Бундеслига форматига ўзгартиш киритиш ҳақидаги таклифига қўшилмаслигини билдирди.

Аввалроқ Хефер шундай деган эди: «Бу «Бавария» учун ҳам қизиқ бўлиши керак. 13 йил ичида ўғлим фақат бир марта улардан бошқа жамоа чемпион бўлганини кўрди — бу зерикарли».

«Менимча, сиз плей-офф тизимини жорий этишни назарда тутяпсиз. Биз бу масалага бошқача қараймиз. Германия чемпиони 34 тур якунида биринчи ўринни эгаллаган жамоа бўлиши керак.

Энг яхши мисол — ўтган мавсумдаги баскетбол. Мунтазам чемпионат якунларига кўра ишончли тарзда биринчи ўринни эгаллагандик, аммо кейин плей-оффнинг ҳал қилувчи ўйинида Берлиннинг «Альба» жамоасига ютқаздик. Чунки жамоамиз мавсум давомида 83 та ўйин ўтказиб, жуда чарчаган эди.

Мени нотўғри тушунманг: финал сериясида «Альба» кучлироқ эди ва шу боис ҳақли равишда ғалаба қозонди. Аммо энг адолатли тизим — Германия чемпиони мунтазам чемпионат якунида биринчи ўринни эгаллаган жамоа бўлиши.

Лигани зерикарли деб бўлмайди. Икки йил аввал «Байер» чемпионликни қўлга киритди, еврокубок йўлланмалари ва лигада қолиш учун кураш эса ҳар доим жуда кескин кечади.

Жаноб Хефер, «Шальке» ҳам бу мавсум барча ўйинларини тўла трибуналар қаршисида ўтказади. Шунинг учун бу нуқтаи назардан Бундеслигани зерикарли деб бўлмайди.

Ҳа, бу масалада фикрларимиз чиндан ҳам фарқ қилади: мен ҳар йили чемпион бўлишни хоҳлайман», — деди Хайнер.