Аргентинада Серхио Агуэро номи яна муҳокама марказида. Бу сафар собиқ футболчини наркобизнесга алоқадор жиноий гуруҳ ўз лойиҳаларига жалб қилишга урингани ҳақида маълумотлар пайдо бўлди.
Аргентинанинг Clarín нашри маълумотига кўра, жиноий гуруҳ вакиллари Агуэрога бир неча бор турли бизнес лойиҳаларида ҳамкорлик қилиш таклифини берган.
Агуэро эса бу таклифларнинг барчасини рад этган. Шунингдек, гуруҳ собиқ футболчининг номи ва у билан боғлиқ лойиҳалардан ноқонуний йўл билан топилган маблағларни легаллаштириш мақсадида фойдаланиш имкониятларини ҳам кўриб чиққан.
Бироқ Агуэро бундай таклифларга ҳам розилик бермаган.
Бу маълумотлар Аргентинада жиноий гуруҳ фаолияти юзасидан олиб борилаётган тергов жараёнида аниқланган. Тергов материалларида Агуэронинг номи гуруҳ аъзолари уни ўз бизнесларига жалб қилишга уринган шахс сифатида тилга олинади.
Шу билан бирга, Агуэро ушбу иш бўйича айбланувчи ҳам, гумонланувчи ҳам эмас ва унга нисбатан тергов олиб борилмаяпти.
:::
