Мадриднинг “Реал” клуби ёзги трансферлар ойнаси вақтида жамоанинг собиқ ҳужумчиси Карим Бенземани ортга қайтариш имкониятларини жиддий кўриб чиққан.

Раҳбарият 38 ёшли франциялик футболчининг тажрибаси янгиланган таркибга ёрдам беришига ишонган. Қолаверса, “Реал”да 14 мавсум ҳаракат қилган ҳужумчига жамоага мослашиш учун ортиқча вақт талаб этилмасди.

Fichajes.net нашрининг ёзишича, ушбу трансфернинг амалга ошмаслигига асосий сабаб — муддат билан боғлиқ муаммо. Бензема Саудия Арабистонининг “Ал-Ҳилол” клуби билан шартномасини 31-август куни бекор қилди. Бу вақтга келиб Европада футболчиларни рўйхатдан ўтказиш муддати тугаб бўлган эди. Оқибатда, унинг Ла Лигага қайтиш имконияти ўз-ўзидан йўққа чиққан.

Маълумот ўрнида, 2022-йилги “Олтин тўп” соҳиби ҳозирча профессионал фаолиятини якунлаш ниятида эмас. Саудия Арабистони чемпионатида 12 та ўйинда майдонга тушиб, 10 та гол урган ҳужумчи ҳануз яхши формада эканлигини исботлаб қўйди. Айни пайтда франциялик футболчига Американинг МЛС лигаси клублари томонидан қизиқиш бўлмоқда.

Эслатиб ўтамиз, Бензема 2009-йилдан 2023-йилгача “Реал” шарафини ҳимоя қилган. Ҳужумчи ўз фаолияти давомида “Лион” ва “Ал-Иттиҳод” клубларида ҳам тўп сурган.