Англия терма жамоасидаги учрашувларни ҳам ҳисобга олганда, Харри Кейн ўтган мавсумда 73 та гол урди. «Бавария» ҳужумчиси бу натижа билан «Олтин тўп» учун асосий даъвогарлардан бири саналмоқда.

Голлар сони бўйича Кейн Лионель Мессига яқинлашди — аргентиналик футболчи 2011/12 йилги мавсумда «Барселона» ва Аргентина терма жамоаси сафида 82 та гол урган. Криштиану Роналду эса ўша мавсумда «Реал» ва Португалия терма жамоаси учун 69 та гол қайд этган.

«Мен Месси ва Роналду ҳукмронлик қилган даврда уларнинг ўйинларини кузатиб катта бўлганман. Уларнинг голлари сони менга ақлбовар қилмасдек туюларди ва ҳақиқатан ҳам шундай. Улар авлодимизнинг, эҳтимол, умуман футбол тарихининг энг буюк икки футболчиси. Уларнинг натижалари фонида 73 та гол мен учун анча таъсирли кўрсаткич», — деди Кейн TNT Sports’га.