«Манчестер Юнайтед» ярим ҳимоячиси Бруну Фернандеш «Олтин тўп» учун 30 нафар номзод қаторига киритилиши кутилмоқда. Бу ҳақда журналист Sam C. маълум қилди. Расмий номзодлар рўйхати 8 сентябрь, сешанба куни эълон қилиниши режалаштирилган.

Ўтган мавсумда Фернандеш АПЛнинг бир мавсумида энг кўп голли узатмани амалга ошириш бўйича рекорд ўрнатди — 21 та ассист. Шунингдек, португалиялик футболчи Англия чемпионатида 35 та учрашувда 10 та гол урди.

Жорий мавсумда эса Фернандеш 3 та ўйинда 3 та гол ва 1 та голли узатма қайд этди.

«Олтин тўп» тақдимот маросими 26 октябрь куни бўлиб ўтиши кутилмоқда. Совриннинг амалдаги соҳиби — «ПСЖ» ҳужумчиси Усмон Дембеле.