Россия Кубогининг 4-босқичидан ўрин олган Костроманинг “Спартак” ҳамда “Рязань” жамоалари ўртасидаги учрашувда ноодатий голли узатма қайд этилди. Ўйиннинг 33-дақиқасида “Спартак” футболчиси Нодир Муҳаммадий тўпни аутдан салто ошган ҳолда куч билан майдонга киритди ва унинг ушбу узатмасидан сўнг Денис Жилмостних учрашувда ҳисобни очди.

Бу 29 ёшли футболчининг сўнгги бир ой ичида аутдан шу тарзда амалга оширган учинчи голли узатмаси ҳисобланади. Бунгача у Хабаровскнинг “СКА” ҳамда Волгограднинг “Ротор” жамоаларига қарши ўйинларда ҳам худди шундай трюкни муваффақиятли бажарган эди.

Костроманинг “Спартак” клуби Муҳаммадий учун биринчи хорижий жамоа бўлиб, у бунгача 6 йил давомида ўз ватанида тўп сурган. Эронлик футболчи ушбу ҳаракати унинг учун одатий ҳол эканлигини таъкидлади:

“Болалигимда гимнастика билан шуғулланганман. Футболда ёшлигимданоқ тўпни аутдан салто орқали киритишни машқ қилиб келаман. Илк бор бундай услубдаги голли узатмани тахминан 7 йил олдин Эронда амалга оширганман. Фаолиятим давомида эса бундай ассистлар сони 10 тадан ошган”.

Нодир Муҳаммадий ўзининг навбатдаги учрашувини 14 сентябрь куни ўтказади. Россия Биринчи лигаси 12-тури доирасида “Спартак” жамоаси “Химки Арена” стадионида Нижнекамскнинг “Нефтхимик” клубини қабул қилади. Ўйин Тошкент вақти билан 18:00 да бошланиши режалаштирилган.