Ўзбекистон Суперлигасининг 21-туридан ўрин олган ОКМК — "Пахтакор" учрашуви якунланди. Олмалиқдаги баҳсда меҳмонлар 3:1 ҳисобида ғалаба қозонди.
"Пахтакор" учрашувни жуда фаол бошлади ва 4-дақиқадаёқ ҳисобни очди. Дилшод Саитовнинг узатмасидан кейин Айман Ҳуссайн тўпни дарвозага йўллади.
24-дақиқада ироқлик ҳужумчи энди ассист муаллифига айланди — унинг узатмасини Иброҳим Ибрагимов голга айлантириб, фарқни иккитага етказди.
Иккинчи бўлимнинг 64-дақиқасида Достонбек Ҳамдамов Абдурауф Бўриевнинг пасидан кейин "Пахтакор"нинг учинчи голини урди.
ОКМК 81-дақиқада битта голга жавоб қайтарди. Гиорги Папава Аҳмадулло Муқумжоновнинг узатмасидан унумли фойдаланди, аммо бу мезбонларни мағлубиятдан қутқариб қолмади.
Шу тариқа, "Пахтакор" Олмалиқда муҳим ғалабага эришди — 1:3. Айман Ҳуссайн учрашувни бир гол ва бир голли узатма билан якунлади.
