«Ньюкасл» ҳимоячиси Льюис Холл яқинда шартномасини узайтирганига қарамай, 2027 йилда клубни тарк этиши мумкин. Бу ҳақда talkSPORT хабар берди.

Манбага кўра, 2026 йил ёзида 22 ёшли англиялик футболчига «Манчестер Юнайтед» қизиқиш билдирган. Холлнинг ўзи ҳам трансферга қарши бўлмаган. Бироқ «Ньюкасл» таклиф миқдоридан қатъи назар, ҳимоячи сотилмаслигини маълум қилган.

Аввалроқ Холл «қарғалар» билан шартномасини 2031 йилгача узайтирган ва амалдаги келишувига яна икки йил қўшганди.

Жамоанинг янги бош мураббийи Маттиас Яйссле Холлга уни асосий футболчилардан бири сифатида кўришини ва чап қанот ҳимоячиси позициясида биринчи рақам деб ҳисоблашини айтган.

Бу Холлни яхшиланган шартлардаги янги келишувга рози бўлишга ишонтирган. Натижада у жамоанинг энг кўп маош олувчи футболчиларидан бирига айланган.

Шунга қарамай, 2026/27 йилги мавсум якунланганидан кейин Холлнинг трансфер бозорига чиқарилиши эҳтимоли истисно этилмаяпти.

2025/26 йилги мавсумда Холл 46 та ўйинда майдонга тушиб, 1 та гол урди ва 2 та голли узатмани амалга оширди.

Transfermarkt Англия терма жамоаси футболчисининг трансфер қийматини 40 миллион еврога баҳоламоқда.