"Манчестер Юнайтед" марказий ҳимоячиси Лисандро Мартинес "Ливерпуль"нинг собиқ футболчиси Жейми Каррагер ҳақида фикр билдирди.

Каррагер аргентиналик футболчи "Манчестер Юнайтед"га эндигина келган пайтда унинг бўйи паст эканини таъкидлаб, Премьер-лигада муваффақият қозона олмаслигини айтган эди. Кейинчалик эса мерсисайдликларнинг собиқ ҳимоячиси бу гаплари учун узр сўраб, адашганини тан олган.

Пайшанба куни "Манчестер Юнайтед" Чемпионлар лигасида "Сабаҳ"ни 4:0 ҳисобида мағлуб этди. Ўйиндан кейин Мартинес CBS Sports студиясига интервью берди. У ерда Жейми Каррагер, Майка Ричардс ва Тьерри Анри эксперт сифатида иштирок этди.

— Каррагернинг ўйинларини кўрганмисан? У сенга қандай футболчи бўлиб кўринади? — деб сўради Ричардс.

— Футболчи сифатидами? Яхши инсон, — деб жавоб берди Мартинес ва студиядагиларнинг кулгисига сабаб бўлди.

— Биламиз, сен бизнинг кўрсатувимизни томоша қиласан. Севимли экспертин ким? — деб яна сўради Ричардс.

— Жавобни ўзларингиз биласизлар. Тьерри Анри.

— Ҳимоячилар ҳақида-чи? Ахир ҳимоячилар доим ҳимоячиларни кузатишади, — дея аниқлик киритди Каррагер.

— Мен яхши футболчиларни кузатаман, — деди Лисандро ва студияда яна қизғин реакцияга сабаб бўлди.

Мартинес "Сабаҳ"га қарши ўйинда "Манчестер Юнайтед"нинг тўртинчи голини урди.