Ирландия Футбол Ассоциацияси (FAI) бош ижрочи директори Дэвид Коуэллнинг маълум қилишича, УЕФА Ирландия ва Исроил терма жамоаларини келажакдаги турнирлар қуръасида бир гуруҳга туширмаслик ҳақидаги сўровни рад этган.

Февраль ойида ўтказилган қуръа натижасида икки жамоа Миллатлар лигасида бир гуруҳдан жой олган ва 27 сентябрь ҳамда 4 октябрь кунлари ўзаро ўйнайди. Учрашувлар Сербияда (томошабинларсиз) ва Венгрияда (ирландиялик мухлисларсиз) нейтрал майдонларда ўтказилади.

Июль ойида FAI делегатлари бойкот қилишга чақириқлар бўлишига қарамай, ушбу учрашувларни ўтказишни қўллаб-қувватлаган. Ўйинларни ўтказиш бўйича қарор Яқин Шарқда давом этаётган можаро фонида янада кўпроқ босимга дуч келган.

«Жавоб жуда аниқ бўлди. Уларда расмий атама бор — аниқ ифодасини эслай олмайман, аммо бир-бири билан қуръада бир гуруҳга туширилиши мумкин бўлмаган жамоалар рўйхатига ўхшаш нарса. У асосан можароларга, тўғридан-тўғри қарама-қаршиликларга асосланади, жамоатчиликдаги кайфиятга эмас. Ирландия ва Исроил ҳеч қачон тўғридан-тўғри можарода бўлмаган. Мен бу жавобни қабул қилдим», — дея спорт амалдорининг сўзларини BBC келтирмоқда.

УЕФА ҳозирча Коуэллнинг баёнотига изоҳ бермаган.