«Барселона» марказий ҳимоячиси Андреас Кристенсен чап сон мушакларидаги муаммо сабаб икки ойгача майдонга тушмаслиги мумкин. Бу ҳақда Barça Universal хабар бермоқда.
Дастлаб 30 ёшли футболчининг тикланиши тўрт ҳафтадан олти ҳафтагача вақт олиши айтилган эди. Бироқ даниялик футболчига яқин манбалар реабилитация жараёни икки ойгача чўзилиши мумкинлигини билдирмоқда.
Кристенсен «Севилья»га қарши 3:1 ҳисобида якунланган учрашувда жароҳат олган ва иккинчи бўлимда алмаштирилган эди.
Ҳимоячи янги мавсумда барча мусобақаларни ҳисобга олганда жами еттита ўйинда майдонга тушиб, битта голли узатмани амалга оширди.
Испания чемпионатининг етти туридан сўнг «Барселона» 21 очко жамғарган ҳолда турнир жадвалида пешқадамлик қилмоқда.
