«Брентфорд» раҳбарияти жамоа вингери Кевин Шаде билан шартномани узайтириш бўйича музокара бошлади. Бу ҳақда Sky Sports News хабар берди.
Манбага кўра, «асаларилар» 24 ёшли футболчига Премьер-лиганинг бир қатор топ-клублари жиддий қизиқиш билдираётгани сабаб музокараларни фаоллаштирган.
Аввалроқ Шадени «Арсенал» ўз сафига қўшиб олишни режалаштираётгани хабар қилинган эди. Энди эса унга «Ливерпуль» ҳам қизиқиш билдирмоқда. Шунингдек, «Тоттенхэм» ва «Челси» ҳам вазиятни кузатиб бормоқда.
Шаде жорий мавсумда АПЛ ва Англия Лига кубоги доирасида 6 та ўйинда майдонга тушиб, 3 та гол урди.
Унинг «Брентфорд» билан амалдаги шартномаси 2028 йилга қадар мўлжалланган.
