«Барселона» клуби ва Каталония расмийлари орасида «Камп Ноу» 2030 йилги жаҳон чемпионати финалига мезбонлик қилиши мумкинлигига ишонч ортиб бормоқда.

Яқинда стадион 2029 йилги Чемпионлар лигаси финалини қабул қилиш учун танланган эди. Бу қарор Испания, Португалия ва Марокаш биргаликда ўтказадиган 2030 йилги жаҳон чемпионати финали учун «Камп Ноу»нинг имкониятларини ҳам оширган.

«Барселона» ва маҳаллий ҳокимият финал мезбонлиги учун ариза устида ишламоқда. Ҳозирча асосий рақиб сифатида Касабланкада қурилаётган «Ҳасан II» стадиони кўрилмоқда. Мадриднинг «Сантьяго Бернабеу» аренаси ҳам даъвогарлар қаторида экани айтилмоқда.

Каталония ҳукумати спорт вазири Берни Альварес «Камп Ноу» финал учун энг муносиб жой, деб ҳисобламоқда.

«Бу финал учун энг яхши жой. Мен шунчаки оптимист бўлаётганим йўқ, балки реал вазиятдан келиб чиқиб гапиряпман. Менимча, 2030 йилги жаҳон чемпионати финали учун энг яхши арена — «Камп Ноу», — деди Альварес.

Унинг таъкидлашича, якуний қарор фақат «Барселона» томонидан қилинган ишларга боғлиқ бўлмайди.

«Бизда имконият бўлади. Керакли вақтда керакли жойда бўлиш муҳим. Аммо натижа 100 фоиз фақат бизнинг ишимизга боғлиқ эмас», — дея қўшимча қилди у.

ФИФА ҳали 2030 йилги жаҳон чемпионати финали қаерда ўтказилишини расман эълон қилмаган. Марокаш футбол федерацияси президенти Фаузи Лекжа эса финал 2027 йилда очилиши режалаштирилган «Ҳасан II» стадионида ўтказилишини айтган.