«Милан»нинг собиқ футболчиси Алессандро Костакурта клуб президенти бўлиш истаги борлигини билдирди. Шу билан бирга, у клубнинг ҳозирги раҳбариятига нисбатан анча шубҳа билан қарашини ҳам яширмади.

«Шуниси аниқки, мен «Милан» учун эшикни ҳеч қачон ёпмаганман — ҳар қандай вариантга очиқман. Аммо бу амалга ошади, деб ўйламайман.

Вазиятга аниқлик керак. Менимча, айримларимиз учун у ерда аллақачон жой қолмаган. Ростини айтсам, мен бунинг ортидан қувмаяпман ва улар ҳам мени излайди, деб ўйламайман», — дея Костакуртанинг сўзларини pianetamilan.it келтирди.

Костакурта футболчилик фаолиятини 2007 йилда якунлаган. У бутун профессионал фаолияти давомида фақат «Милан» сафида тўп тепган.