Кейинги пайтларда "Насаф" сафида бирин-кетин йўқотишлар кузатилмоқда. Бу асосан ҳимоя чизиғига тўғри келаяпти. Кеча Бекободда бўлган учрашувда ҳимоячи Ҳамза Каримовга ҳакам томонидан кўрсатилган сариқ карточка билан унинг "бисоти"даги карточкалар сони тўртта бўлди. У энди "Нефтчи" билан бўладиган учрашувни ўтказиб юборишга мажбур.

Шундай ҳам кейинги пайтлардаги таркиб борасидаги муаммолар етарли эди. Энди бу муаммо ҳам пайдо бўлди.

Ўзбекистон Кубоги финалида майдонга тушган Шуҳрат Муҳаммадиев эса жароҳатини яна янгилаб олган. У энди яна даволанишга мажбур. Унинг қачон сафга қайтиши номаълумлигича қолаяпти.

"Пахтакор"га қарши учрашувнинг биринчи бўлимидан кейин тортишувда юзига мушт еган ва жабрланувчи ҳимоячимиз Мақсуд Каримовнинг қачон майдонга тушиши ҳамон ноаниқ бўлиб турибди. Нега десангиз, ПФЛ тартиб-интизом қумитаси бу масалани ҳозиргача кўриб чиққани йўқ. Ушбу моҳир ҳимоячимизга нисбатан бериладиган жазо ҳали аниқ эмас, баъзи гапларга кўра унга уч ўйиндан четлатиш жазоси ҳам кўрилиши мумкин экан. Лекин унга икки ўйинни ўтказиб юбориш жазоси берилсагина "Нефтчи"га қарши майдонга тушиши мумкин, бўлмаса жамоа унинг ҳам хизматидан фойдалана олмайди.

Шу ерда биз мухлислар клуб раҳбариятидан умид қилиб қолардикки, тезроқ ПФЛга мурожаат қилиб, Мақсуд Каримовга нисбатан жазони енгиллаштириш чораларини кўришса. Чунки у мажорада асосан жабрланди. Бу масалада тезроқ ҳаракат қилинмаса, у ҳам навбатдаги ўйинда майдонга туша олмаслиги мумкин. Бунақа бўладиган бўлса, жамоа ҳимоя чизиғида катта муаммолар пайдо бўлиши турган гап.