Англия терма жамоаси бош мураббийи Томас Тухель Миллатлар лигасида Чехияга қарши ўйин олдидан матбуот анжуманида иштирок этди. Аввалги учрашувда англияликлар ўз майдонида Испанияга 2:3 ҳисобида мағлуб бўлган эди.
«Биз рақибни ҳурмат қиламиз, унинг даражасини яхши биламиз ва Прагадаги бу ўйин қанчалик қийин бўлишини тушуниб турибмиз», — деди Тухель.
Мутахассис шунингдек, Испанияга қарши ўйинда асосий таркибда майдонга тушган Эзри Конса ва Нико О’Райлида соғлиқ билан боғлиқ кичик муаммолар борлигини ва улар Чехияга қарши баҳсда иштирок этмаслиги мумкинлигини маълум қилди.
«Идеал ҳолатда мен ўша таркибни яна майдонга туширишни истардим. Аммо аввал шифокорлар, физиотерапевтлар ва футболчиларнинг ўзи билан гаплашишим керак.
Йиғин бошланишидан олдин таркибда жуда кўп ротация қилмасликни режалаштирган эдим. Лекин биз ҳар доим футболчиларнинг ҳолатига жуда эҳтиёткорлик билан ёндашамиз», — деди Тухель.
Чехия — Англия учрашуви 29 сентябрь куни бўлиб ўтади.
