«Ан-Наср» ҳужумчиси Жоау Феликс Европа футболига қайтишни режалаштирмоқда ва Чемпионлар лигасида иштирок этадиган жамоа изламоқда. Футболчининг асосий танлови ҳамон «Барселона» бўлиб қолмоқда. Унинг агенти Жорже Мендеш каталонияликларга Феликснинг клубга эркин агент сифатида қайтиш истагини аллақачон маълум қилган. Бу ҳақда Sport.es хабар берди.
Манба маълумотига кўра, айни пайтда «Барселона» 26 ёшли ҳужумчини қайтаришни устувор вазифа сифатида кўрмаяпти. Шу билан бирга, каталонияликлар Феликс номзодини бутунлай рад этгани ҳам йўқ.
Клуб мавсум якунланганидан сўнг жамоанинг эҳтиёжларини таҳлил қилишни режалаштирмоқда. Ўшанда португалиялик футболчини эркин агент сифатида таркибга қўшиб олиш варианти «Барселона» учун жозибадор бўлиши мумкин.
Феликс 2023/24 йилги мавсумда «Атлетико»дан ижара асосида «Барселона» сафида тўп тепган. Унинг «Ал-Наср» билан амалдаги шартномаси 2027 йил ёзида якунига етади.
