"Бавария" ва Франция терма жамоасининг собиқ футболчиси Франк Рибери ватандоши Зинедин Зидан ҳамда нидерландиялик Арьен Роббен ҳақида фикр билдирди.

"Арьен билан бизда дунёдаги энг кучли жуфтликлардан бири бор эди. Биз жуда кўп мавсумларни бирга ўтказдик. Балки, бу футбол тарихидаги энг кучли дуэтлардан бири бўлгандир.

Зиданга келсак, "Зизу" — дунёнинг энг яхши футболчиларидан бири. Зинедин менга қўрқмасдан ўйнаш кераклигини айтарди. У мен учун акадек эди", — дея Риберининг сўзларини La Gazzetta dello Sport келтирди.

Рибери фаолиятининг асосий қисмини Мюнхенда ўтказган. У 2007 йилдан 2019 йилгача "Бавария" шарафини ҳимоя қилган.

Франция терма жамоаси сафида эса вингер 81 та учрашувда майдонга тушиб, 16 та гол урган.