Миллатлар лигаси «А» лигаси гуруҳ босқичи 4-туридан ўрин олган Франция ва Бельгия терма жамоалари ўртасидаги учрашув якунланди.

Сен-Денидаги «Стад де Франс» стадионида ўтган баҳсда майдон эгалари 4:1 ҳисобида ишончли ғалаба қозонди. Учрашувни шотландиялик ҳакам Ник Уолш бошқарди.

Ҳисоб 35-дақиқада очилди. Бельгия терма жамоаси ярим ҳимоячиси Доди Лукебакио меҳмонларни олдинга олиб чиқди.

Франция жавоб голини фақат 77-дақиқада уришга муваффақ бўлди — Дезире Дуэ ҳисобни тенглаштирди. Орадан тўрт дақиқа ўтиб, Райан Шерки мезбонларни олдинга олиб чиқди.

88-дақиқада Майкл Олисе Франциянинг учинчи голини урди. 90+1-дақиқада эса у яна бир бор Бельгия дарвозасини ишғол қилиб, дубль қайд этди ва якуний ҳисобни ўрнатди — 4:1.

Тўртта ўйиндан кейин Франция терма жамоаси 10 очко жамғариб, 1-гуруҳ турнир жадвалида пешқадамлик қилмоқда. Бельгия эса 6 очко билан учинчи ўринда бормоқда.

Миллатлар лигасининг амалдаги ғолиби Португалия терма жамоаси ҳисобланади. Португаллар ўтган мавсум финалида Испанияни асосий ва қўшимча вақтдаги 2:2 ҳисобидан сўнг пенальтилар сериясида 5:3 ҳисобида мағлуб этган. Португалия Миллатлар лигасида икки марта ғолиб чиққан.