«Челси»нинг собиқ футболчиси Виллиан 2013 йилда «Тоттенхэм»га ўтишга жуда яқин келгани, аммо сўнгги лаҳзада трансфер амалга ошмай қолганини эслади.

Ўша пайтда «Тоттенхэм» бразилиялик вингерни «Анжи»дан сотиб олишга яқин турганди. Бироқ музокараларга «Челси» ҳам қўшилиб, футболчини ўз сафига оғдириб кетган.

«Мен Лондонда яшашни истардим. Шунинг учун агар «Челси» мени хоҳламаса, «Тоттенхэм»га ўтаман, деб қарор қилгандим. Ҳатто тиббий кўрикдан ҳам ўтдим.

Аммо шартнома имзоланадиган куни ўзимга: «Йўқ, мен «Тоттенхэм»га ўтишни истамайман», дедим. Қасам ичаман, машинада кетаётганимда: «Мен у ерга боришни хоҳламайман. «Челси»га ўтгим келади, аммо уларга керак эмасман», деб ўйлаётгандим.

«Тоттенхэм» базасига етиб келганимда агентим мени кутиб олди ва: «Бизда муаммо бор», деди. Мен тиббий кўрикдан ўта олмаган бўлсам керак, деб ўйладим. Кейин у: «Челси» таклиф юборди», деди. Мен эса: «Нима?! Унда ўша ерга кетдик!» деб жавоб бердим», — деди Виллиан Жон Оби Микелнинг подкастида.

Виллиан 2013 йилдан 2020 йилгача «Челси» шарафини ҳимоя қилди. Кейинчалик у «Арсенал» ва «Фулхэм» клубларида ҳам тўп сурди.