«ПСЖ» матбуот хизмати ижтимоий тармоқдаги саҳифасида Лионель Мессининг Аргентина терма жамоасидаги фаолиятини якунлаганига муносабат билдирди.

«Бу Аргентина билан боғлиқ унутилмас бобнинг якуни. Бундан завқ ол, Лео», — дейилади клуб хабарида.

Месси Аргентина терма жамоаси сафидаги сўнгги учрашувини Бенинга қарши ўтказди. Бу баҳсда «альбиселесте» 3:0 ҳисобида ғалаба қозонди. Николас Отаменди 48-дақиқада ҳисобни очган бўлса, Нико Пас 61-дақиқада иккинчи голни урди. Месси эса 71-дақиқада пенальтини аниқ амалга ошириб, учрашувдаги якуний ҳисобни ўрнатди.

Месси 2021–2023 йилларда «ПСЖ» шарафини ҳимоя қилган. Париж клуби футболчиси бўлган даврида у Аргентина терма жамоаси билан 2022 йилги Жаҳон чемпионатида ғолиб чиққан. Финалда «альбиселесте» Франция терма жамоасини асосий ва қўшимча вақтда 3:3 ҳисобида дуранг ўйнатиб, пенальтилар сериясида 4:2 ҳисобида мағлуб этган.