Микель Артета "Арсенал" билан шартномасини узайтирди. Лондон клуби чоршанба куни испаниялик мутахассис билан 2030 йил ўрталарига қадар мўлжалланган янги келишув имзоланганини эълон қилди. Шундан сўнг Артета ўз таассуротлари билан ўртоқлашди.
"Келажагимни клуб билан боғлаш ва "Арсенал" учун фақат энг яхшисини истайдиган ажойиб инсонлар билан ишлашда давом этиш мен учун катта шараф.
Бу клуб бетакрор. Биз биргаликдаги йўлимизни давом эттиришимиздан жуда фахрланаман. Биз аллақачон ўзига хос ришта ва умрбод хотирамизда қоладиган хотираларни яратдик. Энг ҳаяжонлиси эса — бу ҳали биз эришишимиз мумкин бўлган нарсаларнинг фақат бошланиши.
Мен Стэн ва Жошга ишонч ва қўллаб-қувватлов учун миннатдорман. Клубнинг 140 йиллик тарихидаги бундай алоҳида даврда бу ерда ишлаш мен учун катта шараф.
Бу мен ва оилам учун улкан фахр туйғусини берадиган лаҳза. Ажойиб мухлисларимиздан меҳр ва ҳурматни ҳис қиляпман ва мен ҳам уларга худди шундай муносабатдаман", — дея Артетанинг сўзларини "Арсенал" расмий сайти келтирди.
Айни пайтда "Арсенал" Англия Премьер-лигаси турнир жадвалида иккинчи ўринни эгаллаб турибди.
